Panda23

Vááá er svo erfitt.. ég er gleymin og alltaf að týna öllu, mikið vesen í kringum mig. Ég er skemmtileg, þrjósk, kröfuhörð á sjálfan mig og þá sem mér þykir vænt um. Aldrei fúl, oft reið. Tala of mikið. Sjálfselsk og of góð við mig líka, læt líka þannig við aðra ;D Get logið fyrir aðra en ekki fyrir mig.

Hrúturinn er oft grannur og spengilegur, með augabrúnir og nef sem minna á táknið fyrir stjörnumerkið. Hann er lítið hrifinn af skrautgripum og fötum sem hefta hreyfingafrelsi hans, enda er hann hvatvís og lifandi og fljótur að bregðast við. Hrúturinn er eldmerki, svo fólk sem fætt er í Hrútnum hefur oftast ríka þörf fyrir að tjá sig í verki. Það er dugandi, blátt áfram og á bágt með að þola tafir og aðgerðaleysi. Hrútar eru óþolinmóðir og þrjóskir, en þeir eru líka gæddir persónu-töfrum og stefna einbeittir að settu marki. Þeir eru fæddir leiðtogar og fljótir að hugsa, en eðlislæg hreinskilni veldur því að þeir eiga bágt með að segja ósatt og Hrútar eru oft bæði saklausir og einlægir í hjarta. Hrútar hafa gaman af íþróttum, helst ef í þeim felst hraði, hreyfing og líkamleg snerting, enda finnst þeim fátt verra en sitja aðgerðalausir. Hrúturinn er í eðli sínu brautryðjandi, svo hann hneigist til að velja sér starf sem krefst frumlegrar hugsunar, og margir Hrútar gerast vísindamenn, uppfinningamenn, skurðlæknar, geðlæknar eða sálfræðingar, en Hrúturinn gæti allt eins tekið upp á því að reka eigin fyrirtæki, iðulega innan nýrrar starfsgreinar. Hrútar heillast líka af stjórnmálum og eru oft virkir félagar eða í stjórn síns stéttarfélags. Ef Hrúturinn ætlar að ná langt, þarf hann að læra að stjórna skapi sínu og ætti að huga meira að þörfum og skoðunum annarra, til að komast hjá árekstrum.

Rambó leikfélaganna er mættur á svæðið. Með barn í hrútsmerkinu mega foreldrar búast við miklu fjöri á heimilinu því það ríkir engin lognmolla í kringum hrútinn. Ekki ætlast til þess að barnið sitji kyrrt með hringlu. Þetta er barnið sem veifar þér ofan af hæsta tré, alls óhrætt við að taka áhættu. Hrútsbarnið er allt annað en hljóðlátt og lætur oft vel í sér heyra. Sem eldsmerki er hrúturinn orkumikill og hefur ávallt eitthvað fyrir stafni. Verður erfitt að ráða við litla hrúta? Það er líklegra en ekki. Foreldrar ættu eins fljótt og hægt er að kenna þessu barni að vinna með öðrum börnum. Að deila einhverju með öðrum er eitthvað sem kemur ekki af sjálfu sér – það þarf að kenna litlum hrútum. Þeir eru einnig ákaflega tapsárir. Þeir þrá athygli og eiga mjög auðvelt með að verða sér úti um hana með ýmsum aðferðum. Hrútar eru fæddir leiðtogar og ef þú ætlar að hafa eitthvað að segja er betra að láta þá vita með afgerandi hætti hver er við stjórnvölinn því annars er eins líklegt að stjórnin verði tekin úr þínum höndum. Lítill hrútur er oft eins og ótemja, lítið gefinn fyrir að hlýða reglum og vera þægur nema þegar honum hentar. Vegna þess hve hann er orkumikill er nauðsynlegt að hann fái mikla hreyfingu. Hann verður að fá að hlaupa um og róta til heima hjá sér. Ef hann fær ekki útrás fyrir orkuna verður hann pirraður og ergilegur. Honum líður best í lifandi og fjörugu umhverfi. Þar sem fljótfærni og óþolinmæði eru meðal veikleika hans þarf að kenna honum að hægja á sér og telja upp að tíu áður en hann rýkur af stað. Einnig þarf að venja hann á að ljúka því sem hann byrjar á. Hrúturinn á oft erfitt með að standast áskoranir.

Á vorin er birta vaxandi og veður fer batnandi. Mesti athafnatími ársins er fyrir höndum. Eðli Hrútsins endurspeglar þetta og birtist meðal annars í bjartsýni hans og þeirri vissu að lífið sé jákvætt og honum hagstætt. Hrúturinn er því yfirleitt kraftmikill og drífandi, hress, einlægur og fljótur að framkvæma ætlunarverk sín, enda er honum illa við alla bið. Hann vill gera það strax sem hann fær áhuga á, annars er hætt við að hann missi fljótt áhugann.

Landnám

Hrúturinn þolir illa reglur, kerfi og vanabindingu, en hefur gaman af nýjum áskorunum. Það má líkja honum við landnema sem fer úr öryggi siðmenningarinnar til að nema ný og ókunn lönd. Hrúturinn tendrast yfirleitt upp þegar ný mál eru á dagskrá hans, lifnar við og smitar út frá sér með ákafa sínum, en dofnar síðan og verður leiður ef hann þarf að fást of lengi við það sama. Hann er góður í upphafi, sæmilegur þegar verk er hálfnað en verður oft að beita sig aga til að ljúka verkum. Hann er því fæddur brautryðjandi og frumkvöðull.

Hraði

Að öllu jöfnu er Hrúturinn kappsfullur og baráttuglaður. Hann er eldsmerki og þarf því að hafa líf í kringum sig og líður best ef um einhverja keppni eða áskorun er að ræða. Hrúturinn er lítið fyrir kyrrsetu. Hann er líkamlegt merki og þarf því á hreyfingu og útrás að halda. Hana fær hann annað hvort með því að vinna líkamlega vinnu eða stunda íþróttir, líkamsrækt og útivist. Ef Hrútur dvelur í líflausu umhverfi og þarf að takast á við vanabindingu og endurtekningu tapar hann orku. Hann hvílist því meira af nýjum athöfnum en því að liggja uppi í sófa.

Áhyggjuleysi

Hrúturinn er lítið gefinn fyrir að horfa um öxl. Hann lifir fyrir daginn í dag, horfir fyrst og fremst fram á veginn og veltir sér sjaldan upp úr vandamálum, að minnsta kosti ekki til langframa. Ef erfiðleikar steðja að er hann fljótur að hrista þá af sér. Lífið býður alltaf upp á ný tækifæri.

Sjálfstæði

Hinn dæmigerði Hrútur er fljótfær og á til að vera uppstökkur. Hann er tilfinningaríkur og skapstór. Þetta kemur sérstaklega fram ef einhver ætlar að stöðva hann eða hindra hann í að gera það sem hann hefur ætlað sér. Þá er hætt við að hann rjúki skyndilega upp. Að öllu jöfnu er Hrúturinn þó rólegur og vingjarnlegur í fasi, hress og jákvæður. Hann þolir hins vegar illa að honum sé settur stóllinn fyrir dyrnar og vill vera sjálfstæður og fara eigin leiðir.

Snerpa

Hrúturinn er skorpumaður og spretthlaupari. Lífsorka hans er hröð og hann starfar einna best þegar mikið er um að vera og krafist er snerpu og skjótrar ákvarðanatöku. Um Hrútinn er sagt að hann eigi að treysta á fyrstu tilfinningu sína í hverju máli. Slíkt reynist honum best.

Þetta er bara svo satt varð að hafa það með ;D